Í aðdragandanum að Parísarráðstefnunni um loftslagsmál (COP21) árið 2015 áttu Reykjavíkurborg og Festa frumkvæði að því að forstjórar yfir eitt hundrað fyrirtækja skrifuðu undir Loftslagsyfirlýsingu Festu og Reykjavíkurborgar. Undirritunin fól í sér skuldbindingu um að draga úr losun gróðurhúsalofttegunda, minnka myndun úrgangs, mæla árangur og birta hann. Á þeim tíma var ekki til reiknivél til að mæla kolefnisspor fyrirtækja. Því var settur saman hópur sérfræðinga frá Festu, fyrirtækjum og Reykjavíkurborg sem þróuðu reiknivélina, eða Loftslagsmælinn og hafa uppfært hann árlega á heimasíðu Festu, í formi excel skjals.

Sérfræðingahópinn hafa skipað:

• Sigurpáll Ingibergsson - Vínbúðin
• Eva Ingvarsdóttir - EFLA
• Birgitta Steingrímsdóttir - Umhverfisstofnun
• Birgir Urbancic Ásgeirsson - Umhverfisstofnun
• Snorri Jökull Egilsson - Orkuveitan
• Karen Eyþórsdóttir - Reykjavíkurborg
• Hrönn Hrafnsdóttir - Reykjavíkurborg

Frá upphafi hefur Loftslagsmælirinn verið opinn notendum að kostnaðarlausu og notkun hans fylgt eftir með árlegum spurningakönnunum og fræðsludagskrá fyrir þá sem hafa undirritað Loftslagsyfirlýsingu Festu og Reykjavíkurborgar. Sjá frekari upplýsingar á heimasíðu Festu.

Frá árinu 2016 hefur loftslagsmælirinn verið fáanlegur í formi excel skjals á heimasíðu Festu - og verður það áfram fyrir þá sem elska excel :) En það fíla ekki allir excel og þess vegna er vefútgáfan mikilvægt skref í þá átt að lækka þröskuld lítilla og meðalstórra fyrirtækja og hverskyns skipulagsheilda, til að byrja að mæla og pæla í kolefnisspori sínu.

Vefútgáfan var gerð af teymi þriggja ungmenna sem gáfu vinnu sína til verksins því málefnið er mikilvægt. Þeir Eyþór Máni Steinarsson, Hannes Árni Hannesson og Sólon Örn Sævarsson settu sér það markmið að búa til vefútgáfu í 24 tíma hakkaþoni með Festu á menningarnótt 23. ágúst 2019.

Loftslagsmælirinn er gjöf til samfélagsins. Gjöf sem þróuð hefur verið af fulltrúum yngri og eldri kynslóða, hver með sína sérþekkingu. Sérfæðingahópurinn leggur metnað sinn í að mælirinn sé byggður á bestu mögulegu mælikvörðum og stuðlum með árlegri uppfærslu á þeim sem eru birtar inni í Loftslagsmælinum. Yngri kynslóðin gaf svo vinnu sína og sérþekkingu á tæknilausnum til að gera aðgengi að mælinum ennþá skemmtilegri og auðveldari.

Festa er þakklát öllum þeim sem hafa lagt hönd á plóg og þakkar sérstaklega fyrir gjöfult samstarf við Reykjavíkurborg.

Hér getur félagið undirritað Loftslagsyfirlýsinguna og slegist í hóp á annað hundrað leiðandi fyrirtækja og sveitafélaga á Íslandi.